A Directiva 2007/60/CE do Parlamento Europeo e do Consello, do 23 de outubro de 2007, relativa á avaliación e xestión dos riscos de inundación, trasposta ao noso ordenamento xurídico polo Real decreto 903/2010, do 9 de xullo, de avaliación e xestión de riscos de inundación, ten como principais obxectivos obter un axeitado coñecemento e avaliación dos riscos asociados ás inundacións e lograr unha actuación coordinada de todas as administracións públicas e a sociedade para reducir as consecuencias negativas das inundacións. Para obter estes obxectivos, define como ferramenta principal o plan de xestión do risco de inundación.
O 22 de xaneiro de 2016 publicouse no Boletín Oficial del Estado o Real decreto 19/2016, do 15 de xaneiro, polo que se aproba o Plan de xestión do risco de inundación da demarcación hidrográfica de Galicia-Costa. Segundo a disposición derradeira segunda do Real decreto 19/2016, do 15 de xaneiro, o plan deberá ser revisado e actualizado o máis tardar o 22 de decembro de 2021 e, a seguir, cada seis anos.
Deberanse actualizar e revisar tamén, segundo indica o artigo 21 do Real decreto 903/2010, do 9 de xullo, as restantes fases de implantación da Directiva 2007/60/CE, do 23 de outubro de 2007, a avaliación preliminar do risco de inundación (EPRI) e os mapas de perigosidade e risco de inundación (MAPRI).
O artigo 10.2 do Real decreto 903/2010, do 9 de xullo, referido á cartografía de perigosidade e risco de inundación, determina que os mapas de perigosidade e risco de inundación se someterán a consulta pública durante un prazo mínimo de tres meses.
Augas de Galicia está a traballar na revisión e actualización dos devanditos mapas, polo que conforme o citado artigo, esta dirección
RESOLVE:
Someter a consulta pública durante un prazo de tres meses o documento «Revisión e actualización dos mapas de perigosidade e risco de inundación da demarcación hidrográfica Galicia Costa (ciclo 2021-2027)» correspondente á fase 2, que comprende:
• A revisión dos mapas de perigosidade e risco de inundación de todas as áreas de risco potencial significativo de inundacións (ARPSI) correspondentes ao ciclo 2015-2021, que aínda non foron sometidas a consulta pública.
• A delimitación do dominio público hidráulico cartográfico e as súas zonas de proteción, así como a zona de fluxo preferente, asociada ás novas ARPSI e ampliacións, definidas para o novo ciclo 2021-2027, e a revisión e actualización das ARPSI definidas no ciclo 2015-2021.
A presente consulta pública inclúe os mapas de perigosidade e risco de inundación dos escenarios marcados pola Directiva 2007/60/CE, do 23 de outubro de 2007, relativa á avaliación e xestión do risco de inundación, e a delimitación do dominio público hidráulico cartográfico e as súas zonas proteción, así como a zona de fluxo preferente, tal e como marca o Real decreto 903/2010, do 9 de xullo.
Dada a magnitude desta información, o proceso de pór en consulta pública destes mapas realízase de forma progresiva nas sedes e na páxina web do organismo de bacía e agora anúnciase o comezo da fase 2 de consulta pública.
O sometido a consulta pública é un documento explicativo da metodoloxía empregada na actualización e revisión dos mapas de perigosidade e risco de inundación (MAPRI) da demarcación hidrográfica Galicia Costa do ciclo 2021-2027 e unha serie de información xeográfica que se poderá visualizar ou descargar a través do visor xeográfico da infraestrutura de datos espaciais da demarcación hidrográfica Galicia Costa (IDE-DHGC), que pode consultarse na páxina web oficial de Augas de Galicia (actualmente https://augasdegalicia.xunta.gal/). Dentro do visor, a información xeorreferenciada sometida a consulta pública atópase baixo a epígrafe D2007/60 Mapas Inundables Fluviais ciclo 2021-2027 CP fase 2.
Os mapas de perigosidade e risco de inundación poderánse consultar durante un período de tres (3) meses, contados desde o día seguinte á súa publicación no Diario Oficial de Galicia e, dentro dese prazo, poderanse realizar as achegas e formular cantas observacións e suxestións se consideren convenientes, dirixidas ao organismo de bacía, en calquera das formas previstas no artigo 16.4 da Lei 39/2015, do 1 de outubro, do procedemento administrativo común das administracións públicas.
Para o suposto de ser un suxeito obrigado a relacionarse a través de medios electrónicos coas administraciones públicas ou de optar por este medio, as comunicacións deberán realizarse presentando o formulario do procedemento Presentación electrónica de solicitudes, escritos e comunicacións que non dispoñan dun sistema electrónico específico nin dun modelo electrónico normalizado, con código de procedemento PR004A, dispoñible na sede electrónica da Xunta de Galicia (https://sede.xunta.gal/detalle-procedemento?codtram=PR004A). Neste caso, deberá escollerese como destinatario do formulario a Consellería de Infraestruturas e Mobilidade e Ordenación do Territorio e, dentro desta, Augas de Galicia.
Na medida en que os documentos de propostas, observacións e/ou suxestións presentados conteñan datos de carácter persoal, a súa entrega implicará, de conformidade coa lexislación de protección de datos, o consentimento da súa publicación no marco deste proceso participativo. O tratamento dos datos persoais suxeitarase ao disposto na Lei orgánica 3/2018, do 5 de decembro, de protección de datos persoais e garantía dos dereitos dixitais, e quen participe neste proceso poderá exercer o dereito de acceso, rectificación, cancelación e oposición cubrindo a debida solicitude dirixida a Augas de Galicia.
Calquera dúbida sobre o proceso pode dirixirse ao correo electrónico augasdegalicia.dma@xunta.gal.
Santiago de Compostela, 13 de outubro de 2020
María Teresa Gutiérrez López
Directora de Augas de Galicia